skip to main |
skip to sidebar
- മുജീബുര്റഹ്മാന് കിനാലൂര്
ആവശ്യത്തിന് വാര്ത്തകളും കിടിലന് കഥകളുമില്ലാതെ വരുമ്പോള്, വാര്ത്തകള് സൃഷ്ടിക്കുക മാധ്യമങ്ങളുടെ ദിനചര്യയാണ്. അടുത്തിടെ, കനപ്പെട്ട കഥകളൊന്നുമില്ലാത്ത ഒരിടവേളയില് ഇന്ത്യന് ദേശീയ മാധ്യമങ്ങളില് ഒരു ഫത്വാ വിവാദം കൊടുങ്കാറ്റ് വീശിയത് അങ്ങനെയാണ്. ഫത്വയുടെ വിഷയം പതിവുപോലെ മുസ്ലിം സ്ത്രീ തന്നെ. ഇസ്ലാം സ്ത്രീവിരുദ്ധമാണെന്ന് `തെളിയിക്കാന്' ഇസ്ലാമിക പണ്ഡിതന്മാരുടെ ഫത്വകള് തേടിപ്പിടിച്ച് നല്കുക ദേശീയ മാധ്യമങ്ങളുടെ പതിവുപരിപാടിയാണല്ലോ. ദയൂബന്ദ് പണ്ഡിതന്മാരുടെ ഫത്വ തന്നെയാണ് ഇക്കുറിയും ആഘോഷിച്ചത്. ജനപ്രതിനിധി സഭകളില് 33 ശതമാനം സ്ത്രീസംവരണം ഏര്പ്പെടുത്താന് പോകുന്ന ഒരു സാഹചര്യത്തില്, സ്ത്രീകള്ക്ക് സര്ക്കാര്-സ്വകാര്യ ഉദ്യോഗം പാടില്ലെന്ന് ആധികാരിക പണ്ഡിതന്മാരുടെ ഫത്വ വന്നതായാണ് റിപ്പോര്ട്ട്. ഒരു മാസം മുമ്പേ വന്ന ഫത്വയാണെങ്കിലും വിവാദമായത് മെയ് മധ്യവാരത്തില്. ആവശ്യം വരുമ്പോഴാണല്ലോ ഇത്തരം വിഭവങ്ങള് പുറത്തെടുക്കുക!